कुणाल पोळच्या खुनाचा बदला घेण्यासाठी हल्ला... दहा पिस्तूल, २३ काडतुसे घेऊन टोळक्याकडून प्रयत्न
Editor 
पुण्यात पुन्हा टोळीयुद्ध... कुणाल पोळच्या खुनाचा बदला घेण्याचा प्रयत्न
मित्राच्या खुनाचा बदला घेण्यासाठी सराईत गुन्हेगार असलेल्या टोळक्याने मारेकऱ्यांना गाठून त्यांच्यावर पिस्तूल रोखून जीवे मारण्याचा प्रयत्न केल्याचा प्रकार लोणीकंद परिसरात घडला. या प्रकरणी लोणीकंद पोलिसांनी वेगवेगळ्या ठिकाणांहून सात आरोपींना ताब्यात घेऊन अटक केली. पोलिसांनी आरोपींकडून १० लाखांचे सात पिस्तूल आणि २३ जिवंत काडतुसे जप्त केली.
‘लाइन बॉय’ कुणाल पोळच्या खुनाचा बदला घेण्यासाठी त्याच्या साथीदारांनी दोन हल्लेखोरांना जिवे मारण्याचा प्रयत्न केला. शुभम उर्फ अण्णासाहेब मॅटर अनिल जगताप (वय २७), सुमीत उत्तरेश्वर जाधव (वय २६), अमित म्हस्कु अवचरे (वय २७), ओंकार उर्फ भय्या अशोक जाधव (वय २४), अजय उर्फ सागर बाळकृष्ण हेडगे (वय २७), राज बसवराज स्वामी (वय २६) आणि लतिकेश गौतम पोळ (वय २२) अशी अटक आरोपींची नावे आहेत. वरिष्ठ निरीक्षक पंडित रेजितवाड यांच्या मार्गदर्शनाखाली सहायक निरीक्षक रवींद्र गोडसे, कर्मचारी स्वप्नील जाधव, संदीप तिकोणे, कैलास साळुंखे, अजित फरांदे, सागर जगताप, अमोल ढोणे, शुभम चिनके, साईनाथ रोकडे, पांडुरंग माने, मल्हारी सुपरे, दीपक कोकरे आणि सुधीर शिवले यांनी कामगिरी केली.
कुणाल पोळ खून प्रकरण?
स्वारगेट पोलिस वसाहतीतील कुणाल पोळ आणि आरोपी विशाल सातपुते यांच्यात आर्थिक देवाणघेवाणीवरून वाद निर्माण झाले होते. या कारणावरून विशाल सातपुते आणि त्याच्या साथीदारांनी २०१५मध्ये पोलिस कर्मचाऱ्याचा मुलगा असलेल्या कुणाल पोळचा गोळ्या झाडून आणि हत्याराने वार करून निर्घृण खून केला होता. पोळच्या खुनाच्या आरोपाखाली आरोपींची कारागृहात रवानगी झाली होती.
दोन वर्षांपूर्वी खुनातील संशयित मारेकरी विशाल सातपुते आणि रोहन लक्ष्मण चव्हाण (रा. घोरपडी पेठ) जामिनावर मुक्त झाले होते. मागील महिन्यात दहीहंडीचा कार्यक्रम संपवून दोघे रात्री सासवडहून मांजरीमार्गे कोलवडीतील घरी जाण्यासाठी निघाले होते. त्या वेळी कुणाल पोळच्या खुनाचा बदला घेण्यासाठी अवचरे आणि जाधव यांनी ‘एन्जॉय’ ग्रुपच्या साथीदारांना सोबत घेऊन सातपुते आणि चव्हाणला जिवे मारण्याचा कट रचला. कोलवडी भागात आल्यावर आरोपींनी पिस्तुलाचा धाक दाखवून जिवे मारण्याचा प्रयत्न केला. मात्र, पिस्तुलातून गोळ्या सुटल्या नाहीत. त्यामुळे हल्लेखोर तेथून निघून गेले.
तडीपारी संपताच बदला घेण्यासाठी रचला कट
पोलिसांत तक्रार दाखल केल्यावर लोणीकंद पोलिसांनी दोन पथके तयार करून आरोपींचा शोध सुरू केला. शुभम जगताप आणि सुमीत जाधव यांना मुंढवा आणि इतर पाच जणांना कात्रज भागातून ताब्यात घेऊन अटक करण्यात आली. अटक केलेल्या आरोपींवर गंभीर स्वरूपाचे गुन्हे दाखल आहेत. मुख्य आरोपी अमित अवचरे हा दोन वर्षांसाठी तडीपार झाला होता. दोन महिन्यांपूर्वी त्याची तडीपारीची मुदत संपली होती.
